Eit norsk ansvar

«Fyrst lot alle det skje. No vert nesten ingen stilt til rette for det som skjedde. Medan det har blitt gjennomført eit regelrett folkemord.» Det seier den nederlandske frilansjournalisten Brenda Stoter Boscolo i eit nyleg intervju med Het Parool.

Boscolo har nettopp gjeve ut boka Het vergeten volk (Det gløymde folket), ei bok som så langt diverre kun er tilgjengeleg på nederlandsk. Det er synd, for det er ei viktig bok, ei bok som set søkjelys på den etnisk-religiøse minoritetsgruppa kjent som jesidiar, og på det dei vart utsett for av terrorgruppa IS, då denne tok kontrollen over store område i det nordlege Irak.

Jesidiane har vorte herja med mange gongar opp gjennom historia, ofte fordi dei har vorte skulda for å vera ein slags djevledyrkarar. Ifølgje IS var dei å sjå på som vantru, som eit folk ein kunne gjera med som ein ville. Menn vart slakta ned. Kvinner og born vart gjort til slavar og handelsvarer, kvinner blant anna som sexslavar, medan born vart hjernevaska, og i blant nytta som sjølvmordsbombarar i IS si teneste. I Het vergeten volk slepp dei sjølv til orde. Det gjev eit godt bilete av IS sin djevelskap. Det er ein djevelskap som – for å sitera Het Parool - «snødde ned i ein storm av IS-terror: dei store terroråtaka i Europa, halshuggingar og brenning av gissel, filming av dette».